Մագիստրոսի կրթական ծրագրեր

Հայաստանի ամերիկյան համալսարանում (ՀԱՀ) ստեղծված են անհրաժեշտ բոլոր պայմանները, որպեսզի մագիստրոսի ծրագրերում սովորող ուսանողներն առավելագույնս օգուտ քաղեն իրենց ուսումնառությունից։ ՀԱՀ-ն իր ուսանողներին առաջարկում է միջազգային չափանիշներին համապատասխան բարձրորակ կրթություն. այստեղ սովորում են բազմաթիվ օտարերկրյա ուսանողներ, ուսուցումն իրականացվում է փոքրաքանակ խմբերով, իսկ դասախոսներն ունեն հարուստ և բազմազան մասնագիտական փորձ։ ՀԱՀ-ի դասախոսական կազմում ընդգրկված են աշխարհի տարբեր երկրներից ժամանած մասնագետներ, որոնք կրթություն են ստացել արտերկրի լավագույն համալսարաններում և ունեն հետազոտական հետաքրքրությունների լայն շրջանակ։ Բացի ակադեմիական փորձից՝ նրանք ունեն նաև երկարամյա գործնական փորձ, որը թույլ է տալիս նրանց լավագույնս նախապատրաստել ուսանողներին իրենց ակադեմիական և մասնագիտական զարգացման հաջորդ քայլին։ ՀԱՀ-ի ուսանողները հավաքում, քննադատորեն սինթեզում և վերլուծում են համապատասխան տեղեկությունները՝ բարդ խնդիրներին լուծում տալու համար, իսկ համալսարանն ավարտելուց հետո կիրառում են իրենց առաջնորդական հմտությունները՝ հանդես գալով որպես արդյունավետ և բարոյական բարձր արժեքներով օժտված թիմակիցներ։ Ակադեմիական զարգացման ոգուն համահունչ՝ ՀԱՀ-ի շրջանավարտները հաճախ շարունակում են ուսումը աշխարհի առաջատար համալսարաններում, հիմնադրում են սեփական բիզնեսները և բազմազան եղանակներով ներդրում ունենում հասարակության կյանքում։

ՀԱՀ-ն առաջարկում է մագիստրոսի տասներկու կրթական ծրագիր՝ չորս ֆակուլտետներում․

• Գործարար կառավարման մագիստրոսի ծրագիր/Գործարար վարչարարություն/կառավարում/ (MBA)` ըստ լիցենզիայի
• Կառավարման և վերլուծության մագիստրոսի ծրագիր
• Տնտեսագիտության մագիստրոսի ծրագիր
• Անգլերենի՝ որպես օտար լեզվի դասավանդման մագիստրոսի ծրագիր/Անգլերեն և գրականություն (MATEFL)` ըստ լիցենզիայի
• Իրավագիտության մագիստրոսի ծրագիր
• Մարդու իրավունքների և սոցիալական արդարության մագիստրոսի ծրագիր
• Միջազգային հարաբերությունների և դիվանագիտության մագիստրոսի ծրագիր
• Քաղաքական կառավարման և վերլուծության մագիստրոսի ծրագիր/Քաղաքական կառավարում և քաղաքական վերլուծություն (MPA)` ըստ լիցենզիայի
• Լրագրության մագիստրոսի ծրագիր
• Հանրային առողջապահության մագիստրոսի ծրագիր/Հանրային առողջություն և առողջապահություն (MPH)` ըստ լիցենզիայի
• Արդյունաբերական ճարտարագիտության և համակարգերի կառավարման մագիստրոսի ծրագիր/Արդյունաբերական ճարտարագիտություն (MEIESM)` ըստ լիցենզիայի
• Համակարգչի և տեղեկույթի գիտության մագիստրոսի ծրագիր/Ինֆորմատիկա (համակարգչային գիտություն) (MSCIS)` ըստ լիցենզիայի

Ստորև ներկայացված է յուրաքանչյուր ծրագրի համառոտ նկարագրությունը։ Մենք հորդորում ենք ուսումնասիրել ձեզ հետաքրքրող կրթական ծրագրի կայքը և կապ հաստատել տվյալ ծրագրի հետ՝ լրացուցիչ տեղեկություններ ստանալու համար։

Մանուկեան Սիմոն գործարարության և տնտեսագիտության ֆակուլտետ

• Գործարար կառավարման մագիստրոսի ծրագիր

Գործարար կառավարման մագիստրոսի ծրագիրը 18-22 ամիս տևողությամբ կրթական ծրագիր է՝ նախատեսված աշխատող մասնագետների համար, որոնք ձգտում են զարգացնել իրենց կարիերան՝ միաժամանակ շարունակելով մասնագիտական գործունեությունը։ Դասերն անցկացվում են երեկոյան ժամերին՝ հնարավորություն տալով ուսանողներին համատեղելու աշխատանքը և ուսումը։ Ծրագրի ուսումնական բեռնվածությունը կազմում է 45 կրեդիտ, իսկ բոլոր առարկաները ներկայացվում են մոդուլային ձևաչափով՝ յուրաքանչյուրը 3 կրեդիտ ծավալով։ Ծրագիրը մեկնարկում է օգոստոսին՝ մեկամսյա կարճատև ուսումնական փուլով, որի ընթացքում ուսանողներն անցնում են երկու հիմունքային առարկա՝ «Տվյալների վերլուծության գործիքներ» և «Հաղորդակցություն»։ Այս առարկաները հանդիսանում են պարտադիր նախապայմաններ Գործարար կառավարման մագիստրոսի ծրագրի հետագա բոլոր առարկաների համար։

Ուսումնական ծրագիրը համադրում է Գործարար կառավարման մագիստրոսի ծրագրի դասական կառուցվածքը եվրոպական ձևաչափի և Հարվարդի համալսարանի պարտադիր ու կամընտրական առարկաների մոդելի հետ՝ ապահովելով թե՛ ակադեմիական խորություն և թե՛ գործնական կիրառելիություն։ Ծրագրի շրջանավարտները կարողանում են արդյունավետ կերպով գործել արագ փոփոխվող համաշխարհային շուկայում, կողմնորոշվել տեխնոլոգիական և հաղորդակցական փոփոխությունների պայմաններում, ինչպես նաև արձագանքել Հայաստանի և տարածաշրջանի տնտեսական ու մշակութային զարգացման յուրահատուկ դինամիկային։ Հիմնված լինելով մասնագիտական բարձր մակարդակի, թիմային աշխատանքի և գործնական ուսուցման վրա՝ ՀԱՀ-ի Գործարար կառավարման մագիստրոսի ծրագիրն առանձնանում է իր կարճատև, դինամիկ, մատչելի, թափանցիկ և հարմարավետ ձևաչափով։ Ծրագիրը ներկայացնում է ակադեմիական խիստ պահանջներ՝ առանց որակական չափորոշիչների նկատմամբ որևէ փոխզիջման, ինչի արդյունքում այն հատկապես գրավիչ է դառնում աշխատող, նպատակասլաց մասնագետների համար։ Կարդալ ավելին

• Կառավարման և վերլուծության մագիստրոսի ծրագիր

Կառավարման և վերլուծության մագիստրոսի ծրագիրը, որպես կանոն, իրականացվում է «ամառ-աշուն-գարուն-ամառ-աշուն» ձևաչափով և նախատեսված է բակալավրի ծրագիրը վերջերս ավարտած ուսանողների համար։  Ծրագիրը ներառում է առնվազն 35 կրեդիտ և մեկնարկում է ամառային եռամսյակում։ Կառավարման և վերլուծության մագիստրոսի ծրագիրը եզակի է այն առումով, որ կարևորում է տվյալների և վերլուծական գործիքների կիրառումը կառավարչական որոշումների կայացման ընթացքում՝ բիզնեսի հիմնական գործառական ոլորտներում, այդ թվում՝ ֆինանսներ, հաշվապահություն, գործառնություններ և մարքեթինգ։ Ծրագիրը չի սահմանափակվում միայն բիզնեսի կառավարման առաջադեմ տեսությունների և հասկացությունների ուսուցմամբ․ այն նաև նպաստում է «կոշտ» հմտությունների զարգացմանը՝ իրական նախագծերի շրջանակում կատարվող աշխատանքների միջոցով։

Կառավարման և վերլուծության մագիստրոսի ծրագրի շրջանակում դասավանդում են ինչպես տեղացի, այնպես էլ օտարերկրացի մասնագետներ՝ հետազոտական գործունեության բազմամյա փորձով և ոլորտի խորքային գիտելիքներով։ Նրանք ջանք ու եռանդ չեն խնայում՝ ապահովելու ուսանողներին այն ռեսուրսներով, որոնք անհրաժեշտ են ապագայում մասնագիտական հաջողության հասնելու համար։ Ծրագրի ընթացքում կիրառվում են ոլորտի ամենաարդիական գործիքները՝ զարգացնելու քննադատական մտածողության, խնդիրների լուծման, առաջնորդության և համայնքային ներգրավվածության հմտությունները։ Բացի այդ, ծրագիրը մշտապես կատարելագործվում է, որպեսզի համապատասխանի շուկայի պահանջներին թե՛ ազգային և թե՛ միջազգային մակարդակում։ Կարդալ ավելին

• Տնտեսագիտության մագիստրոսի ծրագիր

Տնտեսագիտության մագիստրոսի ծրագիրն ակադեմիական բարձր պահանջներ ներկայացնող կրթական ծրագիր է, որի նպատակն է ուսանողներին պատրաստել խորհրդատվության, քաղաքականության մշակման և տվյալների վերլուծության ոլորտներում մասնագիտական գործունեություն ծավալելու, ինչպես նաև դոկտորական ծրագրերում ուսումը շարունակելու համար։ Ծրագրի շրջանակում ուսանողները ձեռք են բերում խնդիրների լուծման համար անհրաժեշտ վերլուծական և քննադատական մտածողության հմտություններ, որոնք կիրառելի են տարբեր ոլորտներում և ձևավորվում են տեսական ու էմպիրիկ մեթոդների խորացված ուսուցման միջոցով։

Դիլիջանում իրականացվող Տնտեսագիտության մագիստրոսի ծրագիրը մեկամյա կրթական ծրագիր է, որն առաջարկում է ինտերակտիվ, խմբային ուսուցման միջավայր՝ նախատեսված մինչև 21 ուսանողի համար։ Ծրագրի ուսումնական բեռնվածությունը կազմում է 31 կրեդիտ և կարող է լրացվել մինչև 6 կրեդիտին համարժեք ամառային նախապատրաստական դասընթացներով, որոնք անցկացվում են Երևանում՝ հունիսից օգոստոս ընկած ժամանակահատվածում։ Ծրագրի առավելություններից է Հայաստանի Հանրապետության (ՀՀ) կենտրոնական բանկի հետ հաստատված ռազմավարական գործընկերությունը՝ հետազոտական և ուսումնառության ենթակառուցվածքների համատեղ օգտագործմամբ։ Մենք առաջարկում ենք ուսանողների աջակցությանն ուղղված համապարփակ ֆինանսական փաթեթ, որի շրջանակում նախատեսված է անվճար կացություն հանրակացարանում, ուսման վարձի 90% զեղչ ՀՀ քաղաքացիների և հատուկ կացության կարգավիճակ (10 տարի ժամկետով) ունեցող անձանց համար, ինչպես նաև առաջադիմության հիմքով տրամադրվող 50% կրթաթոշակ օտարերկյա ուսանողների համար։ Մենք ձգտում ենք պատրաստել ոչ միայն մասնագիտական բարձր որակավորում ունեցող մասնագետներ, այլև բազմակողմանիորեն զարգացած անհատներ, որոնք ունակ են քննադատաբար մտածելու, շարունակաբար ինքնակրթվելու և արդյունավետ կերպով համագործակցելու տարբեր միջավայրերում։ Կարդալ ավելին

Հումանիտար և հասարակական գիտությունների ֆակուլտետ

• Անգլերենի՝ որպես օտար լեզվի դասավանդման մագիստրոսի ծրագիր

Անգլերենի՝ որպես օտար լեզվի դասավանդման մագիստրոսի ծրագիրը 1․5 տարի տևողությամբ կրթական ծրագիր է, որը սովորաբար իրականացվում է «աշուն-գարուն-ամառ-աշուն» ձևաչափով։ Ծրագրի շրջանակում ուսանողները ձեռք են բերում անգլերենի՝ որպես օտար լեզվի դասավանդման համար անհրաժեշտ գիտելիքներ, այդ թվում՝ լսարանային և առցանց դասավանդում, ուսումնական ծրագրերի մշակում և գնահատում, ինչպես նաև բարելավում են իրենց մասնագիտական կարողությունները կամընտրական առարկաների միջոցով (օր․՝ «Մասնագիտական անգլերեն», «Անգլերեն երեխաների համար», «Առաջնորդություն», «Տեխնոլոգիաներ»): Աշնանային կիսամյակում մեկնարկող այս ծրագրի ուսումնական բեռնվածությունը կազմում է 37 կրեդիտ լեզվաբանական կրթությամբ ուսանողների համար և 39 կրեդիտ՝ լեզվաբանական կրթություն չունեցողների համար։ Ծրագիրը զարգացնում է ուսանողների հետազոտական և ակադեմիական հմտությունները՝ նախապատրաստելով նրանց արտերկրում դոկտորական կրթություն ստանալու կամ հետազոտական գործունեության ոլորտում տարբեր հաստիքներ զբաղեցնելու համար։ Անգլերենի՝ որպես օտար լեզվի դասավանդման մագիստրոսի ծրագրի շրջանավարտները կառուցում են հաջողակ կարիերա և ունեն անհրաժեշտ պատրաստվածություն՝ կրթական համակարգերն ու գործելակերպերը վերափոխելու համար։

Ծրագրի ուսանողները, ներկայացնելով բազմազան մասնագիտական ոլորտներ, ցուցաբերում են ամուր հանձնառություն թե՛ կրթության և թե՛ անգլերենի՝ որպես օտար լեզվի դասավանդման բնագավառների նկատմամբ։ Նրանք աչքի են ընկնում ուսանելու բացառիկ կարողությամբ և ունեն երկրում ու տարածաշրջանում դրական ազդեցություն ունենալու մեծ ներուժ։ ՀԱՀ-ի բարձր հեղինակությունը շրջանավարտներին զգալի մրցակցային առավելություն է տալիս հայկական աշխատաշուկայում։ Մենք առաջարկում ենք երկրում միակ Անգլերենի՝ որպես օտար լեզվի դասավանդման մագիստրոսի ծրագիրը, որի ուսումնական պլանը մշակված է անգլերենը՝ որպես երկրորդ կամ օտար լեզու դասավանդող մասնագետների համար և համապատասխանում է TESOL միջազգային ծրագրերի ամենաբարձր չափորոշիչներին։ Կարդալ ավելին

• Իրավագիտության մագիստրոսի ծրագիր

Իրավագիտության մագիստրոսի երկամյա ծրագիրը մշակված է՝ հաշվի առնելով ուսանողների և Հայաստանի իրավաբանական ոլորտի կարիքները։ Ծրագրի նպատակն է պատրաստել բարձրակարգ, անգլերենին տիրապետող իրավաբանական խորհրդատուներ, փաստաբաններ և հետազոտողներ, որոնք օժտված են բարոյական բարձր արժեքներով և խորապես ծանոթ են իրավագիտության ոլորտի միջազգային լավագույն փորձին։ Մեր շրջանավարտները ստանձնում են պետական և մասնավոր հատվածներին ծառայելու հանձնառությունը՝ նպատակ ունենալով պաշտպանելու Հայաստանի և հայ ժողովրդի իրավունքները թե՛ երկրի ներսում, թե՛ միջազգային հարթակներում։ Իրավագիտության մագիստրոսի ծրագիրը հաջողությամբ ավարտելու համար ուսանողները պետք է կուտակեն առնվազն 30 կրեդիտ՝ ներառյալ ավարտական աշխատանքը, ինչպես նաև նվազագույնը 1 կրեդիտ շրջակա միջավայրի հետազոտությունների ոլորտում՝ համաձայն համալսարանի կողմից սահմանված պահանջի։ Սովորաբար այս ծրագրի ուսանողները սկսում են ուսումնական տարին աշնանը։  

Իրավագիտության մագիստրոսի ծրագիրը հպարտանում է իր բազմաթիվ շրջանավարտներով՝ բարձրակարգ մասնագետներով և գիտնականներով, որոնք ՀԱՀ-ում ձեռք բերված գիտելիքներն ու հմտությունները ծառայեցնում են հասարակության բարօրությանը թե՛ պետական, թե՛ մասնավոր հատվածներում։ Ծրագրի շրջանավարտները կարևոր ներդրում են ունենում իրավաբանական ոլորտում՝ ապահովելով գործարքների արդյունավետությունն ու կայունությունը, ինչպես նաև ներդրումների անվտանգությունն ու պաշտպանվածությունը։ Իրավագիտության մագիստրոսի ծրագիրը տրամադրում է ամուր հիմք՝ հիմնարար իրավունքների և ազատությունների պաշտպանությունն ու խթանումը, ինչպես նաև վեճերի արդար ու արդյունավետ լուծումը իրավաբանական գործունեության առանցքում պահելու համար՝ անկախ ծառայությունների ոլորտից։ Մեր շրջանավարտները բարձր որակավորում ունեցող մասնագետներ են, որոնք ունակ են բացահայտելու և գործնականում կիրառելու իրավագիտության և քաղաքականության ոլորտների միջազգային լավագույն փորձը, ինչպես նաև նշանակալի ներդրում ունենալու օրենքների, կանոնակարգերի, քաղաքականությունների, ինստիտուտների և իրավական շրջանակների խելամիտ ձևավորման ու կատարելագործման գործում։ Կարդալ ավելին

• Մարդու իրավունքների և սոցիալական արդարության մագիստրոսի ծրագիր

Մարդու իրավունքների և սոցիալական արդարության մագիստրոսի ծրագրի նպատակն է աջակցել նոր սերնդի առաջնորդներին և մարդու իրավունքների ապագա պաշտպաններին՝ հնարավորություն տալով նրանց վստահ և արդյունավետ կերպով գործելու ինչպես տեղական, այնպես էլ միջազգային հարթակներում։ Ծրագիրը զարգացնում է ուսանողների գիտելիքներն ու հմտությունները մի ոլորտում, որտեղ հասարակության բազմաբնույթ մարտահրավերներին հնարավոր է դիմագրավել միայն նորարարական և ստեղծագործական մոտեցումների միջոցով։ Ավելի քան 1.5 տարի տևողությամբ և 36 կրեդիտից բաղկացած այս ծրագրի ընթացքում ուսանողները ձեռք են բերում մի շարք կարևոր փոխանցելի հմտություններ, այդ թվում՝ նախագծերի պլանավորում և գնահատում, հետազոտություն և խնդիրների լուծում, փաստահավաքում, ինչպես նաև մասնագիտական գրավոր և բանավոր հաղորդակցություն։ Ծրագիրը մեկնարկում է աշնանային կիսամյակում։

Այս գիտելիքների և հմտությունների շնորհիվ՝ ուսանողները հաջողությամբ կառուցում են իրենց կարիերան սոցիալական ծառայությունների, իրավաբանության (մարդու իրավունքներ, միջազգային իրավունք), փաստաբանության (ներքին և միջազգային), մարդասիրական ծառայությունների, մարդու իրավունքների և սոցիալական արդարության ծրագրերի, հաղորդակցության, միջազգային զարգացման, միջազգային հարաբերությունների և այլ ոլորտներում։ Մարդու իրավունքների և սոցիալական արդարության մագիստրոսի ծրագիրը ձևավորում է սոցիալական արդարության խորացված հասկացութային ընկալում, ինչպես նաև զարգացնում է մարդու իրավունքների պաշտպանության և խթանման ոլորտում արդյունավետ մեթոդների և մոտեցումների կիրառման հմտություններ՝ միջազգային, տարածաշրջանային և ազգային հարթակներում գործելու համար։ Դասերն անցկացվում են ոլորտի ժամանակակից մոտեցումների հիման վրա և լրացվում միջազգային հեղինակավոր համալսարաններից հրավիրված մասնագետների դասախոսություններով։ Ծրագիրը նաև հնարավորություն է տալիս անցնելու փորձնակություն ազգային և միջազգային առաջատար կազմակերպություններում, ինչպես նաև մասնակցելու Մարդու իրավունքների կլինիկայի աշխատանքներին․ այս եզակի նախաձեռնությունը թույլ է տալիս ձեռք բերված փափուկ հմտությունները վերածել գործնական փորձի՝ մարդու իրավունքների և սոցիալական  արդարության ոլորտում հասարակական հիմունքներով (pro bono) գործունեություն ծավալելու միջոցով։ Կարդալ ավելին

• Միջազգային հարաբերությունների և դիվանագիտության մագիստրոսի ծրագիր

Միջազգային հարաբերությունների և դիվանագիտության մագիստրոսի ծրագիրը 1.5 տարի տևողությամբ և 45 կրեդիտից բաղկացած կրթական ծրագիր է, որը մեկնարկում է աշնանային կիսամյակում։ Ծրագրի նպատակն է ուսանողներին ապահովել անհրաժեշտ գիտելիքներով և գործիքակազմով՝ հանրային ծառայության համակարգում, տեղական և միջազգային հասարակական կազմակերպություններում, ինչպես նաև հասարակայնության հետ կապերի միջազգային գործակալություններում մասնագիտական գործունեություն ծավալելու համար։ Ծրագիրը կիրառում է միջգիտակարգային մոտեցում՝ միջազգային հարաբերությունների, կառավարման և դիվանագիտության ոլորտներում տեղի ունեցող փոփոխությունները քննադատորեն ուսումնասիրելու և գնահատելու նպատակով։ Այն պատրաստում է մասնագետներ, որոնք տիրապետում են համապատասխան հայեցակարգերին, մեթոդաբանություններին և խնդիրների լուծման նորարարական հմտություններին՝ տարածաշրջանային և համաշխարհային քաղաքականության արդի մարտահրավերներին արդյունավետ կերպով արձագանքելու համար։

Միջազգային հարաբերությունների և դիվանագիտության մագիստրոսի ծրագիրն ուսանողներին ապահովում է խորքային գիտելիքներով՝ տարածաշրջանային և միջազգային փոխկապակցված խնդիրները հասկանալու և վերլուծելու համար։ Մեր դասախոսներն ակադեմիական և գործնական բազմամյա փորձ ունեցող մասնագետներ են, որոնք ուսանողներին տրամադրում են մասնագիտական ուղղորդում՝ օգնելով նրանց դիմագրավել երկրների առջև ծառացած տարածաշրջանային և համաշխարհային մարտահրավերներին։ Կարդալ ավելին

• Քաղաքական կառավարման և վերլուծության մագիստրոսի ծրագիր

Քաղաքական կառավարման և վերլուծության մագիստրոսի ծրագիրը 1.5 տարի տևողությամբ կրթական ծրագիր է, որը նպատակ ունի ձևավորելու վերլուծական, քաղաքական, վարչական և առաջնորդական կարողություններով օժտված մասնագետներ՝ Հայաստանում և արտերկրում հասարակական կյանքի զարգացմանը նպաստելու համար։ Ծրագիրը ներառում է 45 կրեդիտ և մեկնարկում է աշնանային կիսամյակում։ Այն առանձնահատուկ կարևորություն է տալիս զարգացման քաղաքականությանը, ռազմավարությանը և առաջնորդությանը՝ որպես Հայաստանի բարեկեցության և կայունության հիմնարար բաղադրիչներ։ Քաղաքական կառավարման և վերլուծության մագիստրոսի ուսանողները սովորում են ձևակերպել քաղաքական հարցեր և պատասխաններ, մշակել հանրային խնդիրներին ուղղված արդյունավետ քաղաքական լուծումներ և կյանքի կոչել այդ լուծումները՝ պետական, մասնավոր և ոչ առևտրային կազմակերպություններում պահանջվող առաջնորդական և կառավարչական կարողությունների կիրառմամբ։

Քաղաքական կառավարման և վերլուծության մագիստրոսի ծրագիրը մշակված է վարչական պետական համակարգի ձևավորման և պահպանման հետ կապված հանրային խնդիրներին նորարարական լուծումներ առաջարկելու նպատակով։ Հայաստանում կենսունակ պետական հատվածի ձևավորումը քաղաքական, տնտեսական և սոցիալական զարգացման առանցքային խնդիրներից է։ Քաղաքական կառավարման և վերլուծության մագիստրոսի ծրագրի շրջանավարտները կդառնան ոչ միայն քաղաքական կառավարման ոլորտի հմուտ մասնագետներ, այլև պատասխանատու համաշխարհային քաղաքացիներ՝ ունակ տարբերակելու հասարակության իրական կարիքները կենսական անհրաժեշտություն չներկայացնող ցանկություններից։ Կարդալ ավելին

• Լրագրության մագիստրոսի ծրագիր

Լրագրության մագիստրոսի ծրագիրը 14 ամիս տևողությամբ կրթական ծրագիր է, որը ցուցաբերում է համապարփակ մոտեցում լրագրողական կրթությանը։ Ծրագրի նպատակն է պատրաստել մասնագետներ, որոնք կարող են հաջողությամբ հաղթահարել ոլորտի ներկայիս և ապագա մարտահրավերները։ Ծրագրի շրջանակում ուսանողները ձեռք են բերում լրագրության հիմնարար հմտություններ և էթիկական գործելակերպ, այդ թվում՝ լրահաղորդում, տեքստերի գրություն և խմբագրում տարբեր մեդիա հարթակներում (տպագիր, աուդիո, վիդեո և առցանց ձևաչափերով)։ Սեմինարային դասերի ընթացքում ուսումնասիրվում են տարածաշրջանին առնչվող հայեցակարգերն ու տեսակետները՝ ներառյալ հակամարտությունների լուսաբանումը և Հայաստանի քաղաքական զարգացումները, ինչպես նաև լրատվական կազմակերպությունների ձեռնարկատիրական գործունեությունը և նորարարական բիզնես մոդելները։

Լրագրության մագիստրոսի ծրագրի ուսումնական բեռնվածությունը կազմում է 45 կրեդիտ։ Ծրագիրը մեկնարկում է յուրաքանչյուր տարվա հունիսին՝ երկու ամառային դասընթացներով և ավարտվում է հաջորդ ամռանը, որի ընթացքում ուսանողները պատրաստում են ծավալուն մուլտիմեդիա նախագիծ և անցնում երեքշաբաթյա փորձնակություն մեդիա կազմակերպություններում՝ թե՛ Հայաստանում, թե՛ ԱՄՆ-ում։  ՀՀ քաղաքացիները, հատուկ կացության անձնագիր (տրվում է 10 տարի ժամկետով) ունեցող անձինք, ինչպես նաև Արցախից տեղահանված, ժամանակավոր պաշտպանություն ստացած անձինք կարող են օգտվել ուսման վարձի 90% զեղչից։ Կարդալ ավելին